النور شعشع وزاح الليل وسدوله
واكتفّتْ اللي على العتمه سرايدها
واخذت لي في مساحات الفكر جوله
اترك مخاسيرها واشري فوايدها
معاني الشعر منقوضه ومفتوله
والذايقه ماتحب الا فرايدها
في حزةٍ يتعب الشاعر على قوله
قريحته ماتخونه في قصايدها
افراحنا مع جميع الناس منقوله
ناسٍ على ديننا حنا نعايدها
والحزم له عاصفة والشعب له دوله
دولة فخر والملك سلمان قايدها
الحاكم اللي يْبرهن قوله افعوله
ماهي تصاريح تنشر في جرايدها
جمايله في بطون الشعب مشموله
وشعوب تحتاج فزعاته سنايدها
يوم اعلن الحرب صار وطقة طبوله
كرامة العُرب في ماصار عايدها
خلا اليمن بالفضاء والارض معزوله
ماينثني دونها والرعب سايدها
شاور شيوخ الخليج وقدموا زوله
والسيطرة مملكتنا من عوايدها
شنّتْ على الحوثي وصالح مع فلوله
غاراتها مستمره خاب صايدها
وحنا نبايع وضد افكار مشلوله
ولانْفاوض نواقصها وزايدها
برقابنا سمعة الأسلام محموله
ونذوُد عنْها لياحلّت شدايدها
تمت وعطر الكلام الزين مدلوله
من شاعرٍ باحت شعوره جدايدها
حمد الدليهي
